Kabinetdə ölçülən bir rəqəm çox vaxt həqiqəti göstərmir. Bəzi adamlarda təzyiq yalnız həkim yanında qalxır, bəzilərində isə əksinə — evdə yüksək olur, kabinetdə normal.

Ona görə də düzgün aparılan ev ölçmələri bizim üçün ən dəyərli məlumat mənbəyidir. Şərt odur ki, düzgün aparılsın.

Aparat seçimi

Bazuya taxılan avtomatik aparat seçin. Bilək və barmaq aparatları rahatdır, amma nəticələri daha az etibarlıdır.

Mancon ölçüsü vacibdir. Qolunuz yoğundursa, standart mancon nəticəni olduğundan yüksək göstərir. Alarkən qol ölçünüzə uyğun mancon götürün.

Aparatı ildə bir dəfə həkim kabinetindəki ölçmə ilə tutuşdurun.

Ölçmədən əvvəl

30 dəqiqə ərzində qəhvə içməyin, siqaret çəkməyin, idman etməyin. Sidik kisəsi dolu olmasın — bu, nəticəni əhəmiyyətli dərəcədə qaldırır. Ölçmədən əvvəl 5 dəqiqə sakit oturun. Bu 5 dəqiqə ən çox buraxılan addımdır və ən çox səhvə səbəb olur.

Ölçmə anında

Kürsüdə oturun, kürəyiniz arxaya söykənsin. Ayaqlar yerə düz dəysin, ayaqları bir-birinin üstünə aşırmayın. Qol masanın üstündə, mancon ürək səviyyəsində olsun. Mancon çılpaq qola taxılsın — nazik köynəyin üstündən olar, qalın paltarın üstündən yox. Ölçmə zamanı danışmayın.

İki ölçmə aparın, aralarında 1–2 dəqiqə fasilə ilə. Nəticələr arasında böyük fərq varsa, üçüncü ölçmə edin.

Nə vaxt və nə qədər ölçməli

Diaqnoz qoyulan və ya dərman tənzimlənən dövrdə: 7 gün ərzində, səhər və axşam, hər dəfə 2 ölçmə.

Səhər — durduqdan sonra, dərman qəbulundan əvvəl. Axşam — yatmazdan əvvəl.

Vəziyyət sabitləşəndə həftədə bir-iki gün kifayət edir.

Hər gün gün ərzində 10 dəfə ölçməyin. Bu, məlumat vermir, narahatlıq yaradır.

Qeydiyyat

Tarix, saat, yuxarı və aşağı göstərici, nəbz. Kağızda və ya telefonda — fərqi yoxdur, əsas odur ki, qəbula gətirin.

Qeyd edin: ölçmə anında özünüzü qeyri-adi hiss edirdinizsə (baş ağrısı, həyəcan, yuxusuz gecə), bunu yazın.

Ən çox edilən 5 səhv

  1. 5 dəqiqəlik sakitliyi buraxmaq
  2. Qalın paltarın üstündən ölçmək
  3. Yalnız bir ölçmə edib onu son həqiqət saymaq
  4. Yüksək rəqəm görüb dərhal təkrar-təkrar ölçmək — narahatlıq təzyiqi daha da qaldırır
  5. Yalnız pis rəqəmləri yazmaq — bu, mənzərəni təhrif edir

Rəqəm yüksək çıxdı, nə edim?

Bir dəfə yüksək ölçmə diaqnoz demək deyil. Yuxarıdakı qaydalara riayət edərək bir həftə ölçün və nəticələri həkimə göstərin.

Amma bir istisna var: təzyiq çox yüksəkdirsə və eyni zamanda güclü baş ağrısı, görmə pozğunluğu, sinə ağrısı, təngnəfəslik və ya nitq pozğunluğu varsa — gözləmək lazım deyil, təcili yardım çağırın (103).

Dərmanınızın dozasını özbaşına artırmayın.

Tez-tez verilən suallar

Bu yazı ümumi məlumatlandırma məqsədi daşıyır və həkim müayinəsini, fərdi diaqnozu və təyin olunmuş müalicəni əvəz etmir. Burada oxuduqlarınıza əsaslanaraq dərmanınızı dayandırmayın və ya dozasını dəyişməyin.

Qəbul və əlaqə